Talba għal Riċerka fl-Iskejjel

Talba għal Riċerka fl-Iskejjel, Istituzzjonijiet jew Organizzazzjonijiet

Termini ta’ Referenza

L-awtorizzazzjoni sabiex issir riċerka fl-Iskejjel, Istituzzjonijiet jew Organizzazzjonijiet li jaqgħu taħt il-kompetenza tal-Ministeru għall-Edukazzjoni, l-Isport, iż-Żgħażagħ, ir- Riċerka u l-Innovazzjoni (MEYR) għandha tinkiseb mill-Kumitat tal-Etika tar-Riċerka (MREC), fi ħdan it-Taqsima tar-Riċerka u l-Evalwazzjoni Interna tal-Iskejjel u ppreżentata lill-Kap tal-Iskola/Istituzzjoni/Organizzazzjoni fejn ir-riċerkatur għandu l- ħsieb li jwettaq ir-riċerka.

Ir-riċerkaturi għandhom jikkonformaw mal-prinċipji tal-kondotta tar-riċerka etika, kif speċifikat fil-Politika u l-Proċeduri tal-Etika tar-Riċerka, misjuba hawn.
Ix-xogħol ta’ riċerka jitwettaq fid-diskrezzjoni tal-Kap tal-Iskola, tal- Istituzzjoni jew tal-Organizzazzjoni, u huwa soġġett għall-kundizzjonijiet tiegħu jew tagħha.
Il-Kumitat tal-Etika tar-Riċerka MEYR jirriżerva d-dritt li jirtira l-permess biex titwettaq ir-riċerka fi kwalunkwe ħin u mingħajr avviż minn qabel
Mat-tlestija tax-xogħol ta’ riċerka, ir-riċerkatur għandu jipprovdi ‘soft copy’ tax-xogħol imwettaq lis-Sezzjoni tar-Riċerka fi ħdan it-Taqsima tar-Riċerka u l-Evalwazzjoni Interna tal-Iskejjel kif ukoll lill-Kap tal-Iskola/Istituzzjoni/Organizzazzjoni fejn saret ir-riċerka.
Mistoqsijiet offensivi, ta’ preġudizzju, jew ta’ natura mhux etika mhumiex permessi. Ir-riċerkatur għandu jikseb l-approvazzjoni biex iwettaq ir-riċerka mill-Kumitat tal-Etika tal-Istituzzjoni Edukattiva Ogħla rispettiva. Dawn il- proċeduri huma konformi mal-Att dwar il-Protezzjoni tad-Dejta sabiex jiġu mħarsa d-drittijiet ta’ min qed jipparteċipa fir-riċerka.

Kif tapplika

Jekk jogħġbok imla u ssottometti l- formola online tat-Talba għar-Riċerka li tinsab hawn. (Tissottomettix applikazzjoni bi prova jew applikazzjonijiet duplikata).
Wara li tissottometti l-applikazzjoni, ibgħat email lil rsird.meyr@gov.mt u hemeż id-dokumenti meħtieġa KOLLHA elenkati hawn taħt. (Ara l-lista ta’ dokumenti meħtieġa).
Fl-email, ħu ħsieb li tikteb ismek u kunjomok, u d-data tal-applikazzjoni.
Jekk qed titlob ukoll għal xi dejta, ġentilment niżżel dan fl-email tiegħek.

Il-Kumitat tal-Etika tar-Riċerka se jirrikonoxxi l-email u l-applikazzjoni tiegħek fi żmien ħamest (5) ijiem tax-xogħol, u jipprovdilek numru ta’ referenza tal-applikazzjoni li tkun meħtieġ tikkwota fi kwalunkwe komunikazzjoni mal-istess Kumitat.

Talba għal Dejta

Meta riċerkatur jeħtieġ dejta, bħal informazzjoni dwar in-numru ta’ għalliema li jgħallmu suġġett partikolari, jew in-numru ta’ studenti SEN, huwa meħtieġ li jimla t- taqsima intitolata Talba għal Dejta. Ir-riċerkatur huwa mitlub jipprovdi d-dettalji preċiżi tad-dejta meħtieġa u jiddikjara kif din se tikkontribwixxi għar-riċerka.

Id-dejta se tiġi pprovduta mis-Sezzjoni tar-Riċerka fi ħdan it-Taqsima tar-Riċerka u l- Evalwazzjoni Interna tal-Iskejjel. Jekk jogħġbok, innota li r-riċerkatur huwa awtorizzat li juża BISS id-dejta pprovduta lilu għar-riċerka li għaliha jkun ingħata l-awtorizzazzjoni. Meta r-riċerka tiġi ffinalizzata, id-dejta kollha pprovduta lilu għandha titħassar.

Hemżiet

Jekk jogħġbok assigura li d-dokumenti li ġejjin, bl-użu tal-mudelli li jinsabu hawn taħt, jiġu mehmuża mal-email li inti mitlub tibgħat lill-MREC, wara li tissottometti l- applikazzjoni tiegħek. Deskrizzjoni dettaljata ta’ x’għandu jiġi inkluż fid-dokumenti tinstab ukoll fil-Politika u l-Proċeduri tal-Etika tar-Riċerka tal-Ministeru għall- Edukazzjoni, l-Isport, iż-Żgħażagħ, ir-Riċerka u l-Innovazzjoni.

Ittra ta’ Informazzjoni u Talba għal Permess biex titwettaq Riċerka indirizzata lill-Kap tal-Iskola, Istituzzjoni jew Organizzazzjoni.
Formola tal-Kunsens għar-Riċerka għall-Parteċipanti Adulti . (Meħtieġa verżjonijiet bil-Malti u bl-Ingliż meta l-formoli huma maħsuba għall- użu mal-ġenituri.)
Formola ta’ Kunsens għar-Riċerka li tinvolvi ġenituri/gwardjani li huma legalment responsabbli għal-minorenni . (Verżjonijiet bil-Malti u bl-Ingliż)
Formola ta’ Kunsens għar-riċerka mat-tfal, minuri jew adulti li legalment ma jistgħux jagħtu l-kunsens. (Verżjonijiet bil-Malti u bl-Ingliż)
Il-formola ta’ awtovalutazzjoni mimlija . (Jekk jogħġbok issottometti din il-formola anki jekk ħallejt il-kaxxi kollha vojta.)
Kopja tal-kwestjonarju/mistoqsijiet tal-intervisti/materjal rilevanti ieħor li se jintuża għall-ġbir tad-dejta (Meħtieġa verżjonijiet bil-Malti u bl-Ingliż meta l-formoli huma maħsuba għall- użu mal-ġenituri u l-minorenni.)
Liċenzja/permess għall-użu ta’ għodod ta’ riċerka (eż. constructs/testijiet).
Approvazzjoni mill-Bord tal-Analiżi tal-Etika tal-istituzzjoni rispettiva.

Il-proċess għall-approvazzjoni tar-riċerka jista’ jieħu sa erba’ (4) ġimgħat, jiddependi miż-żmien tas-sena li fiha tiġi sottomessa l-applikazzjoni. Inti se tkun ikkuntattjat/a jekk fl-applikazzjoni tiegħek ikun hemm informazzjoni nieqsa jew mhux korretta Jekk tonqos li tipprovdi dawn id-dokumenti u l-informazzjoni meħtieġa kollha, ikun hemm ir-riskju li l-approvazzjoni biex wieħed ikun jista’ jipproċedi bir-riċerka tiegħu ddum biex tinħareġ u l-perjodu ta’ erba’ ġimgħat ma jistax jibqa’ jiġi ggarantit.

Mal-approvazzjoni tal-istudju ta’ riċerka, tirċievi email bl-awtorizzazzjoni uffiċjali. L- istess email se tintbagħat lill-iskejjel, lill-istituzzjonijiet jew lill-organizzazzjonijiet fejn se ssir ir-riċerka. Kwalunkwe bidla fil-kampjun jew fil-kontenut tal-istudju għandha tiġi kkomunikata lill-Kumitat tal-Etika tar-Riċerka tal-Ministeru sabiex tkun ikkunsidrata mill-ġdid.

Għal aktar kjarifiki, inti ġentilment mitlub/a tikkuntattjana permezz ta’ email fuq rsird.meyr@gov.mt.