It-Taqsima tal-Evalwazzjoni Interna tal-Iskejjel torganizza laqgħat mitluba mit-tmexxija tal-iskejjel sabiex tindirizza oqsma speċifiċi u toffri appoġġ immirat u relatat mal-proċess tal-evalwazzjoni interna tagħhom. Dawn il-laqgħat ikopru firxa ta’ suġġetti relevanti, inkluż il-proċess tal-evalwazzjoni interna, l-ippjanar effettiv tal-iżvilupp tal-iskola u għajnuna fl-iżvilupp tal-viżjoni u l-missjoni tal-iskola. Barra minn hekk, it-Taqsima tal-Evalwazzjoni Interna tal-Iskejjel torganizza laqgħat biex tindirizza oqsma speċifiċi identifikati permezz ta’ kwestjonarju li jgħin fl-analiżi tal-ħtiġijiet tat-taħriġ, filwaqt li tassigura li l-appoġġ li jingħata lill-iskejjel ikun wieħed adattat għall-ħtiġijiet uniċi ta’ kull skola u kulleġġ partikolari. Id-Direttorat għandu l-għan li jfiehem il-proċeduri tal-evalwazzjoni, jindirizza l-isfidi u b’mod kollaborattiv jiżviluppa strateġiji li jippromwovu titjib kontinwu u riżultati sinifikanti billi jaħdem mill-qrib mat-tmexxija tal-iskejjel.
It-Taqsima tal-Evalwazzjoni Interna tal-Iskejjel toffri sessjonijiet ta’ żvilupp professjonali li huma mfassla apposta għall-iskejjel u l-kulleġġi u li jindirizzaw il-ħtiġijiet speċifiċi kif mitlub mill-istess tmexxija tal-iskejjel. Dawn is-sessjonijiet ikopru varjetà ta’ suġġetti li huma relevanti u mfassla sabiex jagħtu l-għodod neċessarji lill-edukaturi biex iwettqu u jsostnu t-titjib fl-iskejjel. Is-suġġetti jinkludu l-iżvilupp ta’ komunità ta’ prattika riflessiva permezz tal-proċess tal-evalwazzjoni interna, l-ippjanar ta’ żvilupp tal-iskejjel, l-identifikazzjoni u l-użu tal-aħjar għodod ta’ riċerka xierqa għall-ġbir tad-data u l-evalwazzjoni interna, it-twettiq tal-eżerċizzju ta’ analiżi SWOT, it-tfassil ta’ programm ta’ żvilupp professjonali tal-istaff fl-iskejjel u l-iżvilupp ta’ pjanijiet ta’ azzjoni għat-titjib tal-iskejjel. Kull sessjoni hija mogħtija minn esperti fil-qasam, li jassiguraw li l-parteċipanti kollha jiksbu l-għarfien prattiku u l-għodod meħtieġa li jwasslu għal titjib kontinwu fil-kuntest edukattiv tagħhom.
It-Taqsima tal-Evalwazzjoni Interna tal-Iskejjel torganizza laqgħat ta’ kull xahar ma’ Uffiċjali Edukattivi responsabbli għall-kurrikulu fil-kulleġġi tal-istat. Dawn il-laqgħat iservu bħala networking u joħolqu komunità ta’ prattika dinamika fejn jinqasmu l-esperjenzi b’mod kollettiv, isiru diskussjonijiet dwar l-isfidi li jiltaqgħu magħhom, ikunu esplorati strateġiji u jkun hemm riflessjonijiet dwar kif tista’ tingħata għajnuna fl-evalwazzjoni tal-iskejjel. L-enfasi hija fuq suġġetti relevanti li għandhom għanijiet komuni, bħal għodod għat-twettiq tal-evalwazzjoni interna tal-iskola bbażata fuq l-evidenza, għarfien mir-riċerka edukattiva lokali u internazzjonali u l-implikazzjonijiet tal-istrateġiji nazzjonali fil-prattika ta’ kuljum. Barra minn hekk, l-Uffiċjali Edukattivi għandhom l-opportunità li jippreżentaw l-inizjattivi tal-kulleġġ tagħhom stess, filwaqt li jrawmu l-kollaborazzjoni u l-innovazzjoni fl-istituzzjonijiet kollha. Permezz ta’ dan in-network ta’ sapport, dawn il-laqgħat għandhom l-għan li jippromwovu t-tkabbir kontinwu u l-iżvilupp ta’ prattiki effettivi biex jittejbu l-kisbiet edukattivi.
Permezz tad-Data Warehouse, stabbilita mit-Taqsima tar-Riċerka fi ħdan id-Direttorat, inbdiet inizjattiva ffukata fuq l-analiżi tad-data tal-istudenti, b’mod partikolari dwar l-assenteiżmu u l-kisbiet tal-ħiliet. Id-data tiġi analizzata fuq diversi livelli – dak nazzjonali, skont il-kulleġġ u skont l-iskola kif meħtieġ – biex tipprovdi għarfien maħsub biex jappoġġja lill-kulleġġi u lill-iskejjel fl-identifikazzjoni ta’ oqsma li jeħtieġu titjib. L-għajnuna li l-iskejjel jirċievu dwar l-evalwazzjoni interna tgħinhom sabiex jidentifikaw l-oqsma li jkun jeħtiegilhom titjib. Isiru wkoll laqgħat mal-Kapijiet tan-Networks tal-Kulleġġi u l-Kapijiet tal-Iskejjel biex jiġu diskussi s-sejbiet u jiġu żviluppati b’mod kollettiv strateġiji li jixprunaw bidla pożittiva fir-riżultati tal-istudenti.
