Programm ta’ Riforma Nazzjonali (NRP)
Il-Programm ta’ Riforma Nazzjonali (NRP) jipprovdi ħarsa ġenerali lejn il-miżuri tal-politika u r-riformi ekonomiċi li bħalissa qed jiġu implimentati f’Malta, inklużi dawk li jindirizzaw ir-Rakkomandazzjonijiet Speċifiċi għall-Pajjiż (CSRs) li Malta tkun irċeviet wara l-proċess tas-Semestru Ewropew tas-sena preċedenti. Il-kwistjonijiet ekonomiċi ewlenin huma enfasizzati wkoll, flimkien mar-rapporti dwar il-progress ta’ Malta lejn l-Għanijiet ta’ Żvilupp Sostenibbli (SDGs) tan-Nazzjonijiet Uniti, l-aġġornamenti dwar l-użu tal-fondi tal-UE, u l-iżviluppi fil-Pilastru Ewropew tad-Drittijiet Soċjali.
Id-Direttorat għar-Riċerka u l-Evalwazzjoni Interna tal-iskejjel (RSIRD) għandu rwol kruċjali fil-proċess tal-NRP billi jiġbor il-feedback u d-data miġbura minn diversi dipartimenti u entitajiet fi ħdan il-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni (MEYR). Dan jassigura li l-informazzjoni ppreżentata tkun preċiża, komprensiva, u tirrifletti l-inizjattivi u l-istrateġiji tal-gvern biex jintlaħqu kemm l-għanijiet nazzjonali kif ukoll dawk Ewropej.
L-Għanijiet ta’ Żvilupp Sostenibbli (SDGs) tal-UNESCO
L-Għan ta’ Żvilupp Sostenibbli 4 (SDG 4) ifittex li jassigura aċċess għall-edukazzjoni ekwa u ta’ kwalità fl-istadji kollha tal-ħajja. Fl-2015, Il-qafas strateġiku taż-Żona Ewropea tal-Edukazzjoni 2030, talab lill-pajjiżi kollha jistabbilixxu “benchmarks intermedji xierqa biex iservu bħala miri kwantitattivi fir-reviżjoni tal-progress globali vis-à-vis miri ppjanati fuq medda itwal ta’ żmien.’’
L-Indikaturi tal-Iżvilupp Sostenibbli stabbiliti min-Nazzjonijiet Uniti (NU) huma kollha bbażati fuq metodoloġiji approvati internazzjonalment. Id-Direttorat għar-Riċerka u l-Evalwazzjoni Intern tal-Iskejjel jiġbor u janalizza data dwar il-kisbiet ta’ Malta fl-SDG 4. Permezz ta’ dan, jiġu stabbiliti l-benchmarks ta’ Malta dwar l-SDG4 u jkun issorveljat il-progress sabiex jintlaħqu dawn il-miri.
